ເປັນພືດເຄືອ ເລືອຕາມໜ້າດິນ ຫຼື ຕົ້ນໄມ້ອື່ນ, ລຳຕົ້ນເປັນຂໍ້. ໃບດ່ຽວ, ຈັບກົງກັນຂ້າມ, ແຜ່ນໃບຮູບຫົວໃຈ, ຂະໜາດ 12-20 x 6-9 ຊມ, ປາຍຮຽວແຫຼມ, ໂຄນວ້ຳເລິກເປັນຮູບຫົວໃຈ, ຂອບໃບຫຍັກວ້ຳໃກ້ໂຄນ, ເສັ້ນໃບອອກຈາກໂຄນໃບ 3-5 ເສັ້ນ. ດອກສີຟ້າອ່ອນ ເຖິງສີຟ້າເຂັ້ມ, ເກິດຈາກຊອກໃບ, ຫ້ອຍລົງ. ໃບປະດັບຂະໜາດໃຫຍ່ 2 ອັນ, ຮູບຂອບຂະໜານ, ປາຍແຫຼມ, ຍາວ 3 ຊມ. ກີບດອກ 5 ກີບ, ຂະໜາດບໍ່ເທົ່າກັນ, ສ່ວນໂຄນເຊື່ອມກັນເປັນຫຼອດ, ສ່ວນປາຍບານອອກ, ຂະໜາດເສັ້ນຜ່າສູນກາງ 5-9 ຊມ. ເກສອນຜູ້ 4 ອັນ, ສັ້ນ 2, ຍາວ 2, ຢູ່ໃນຫຼອດດອກ. ໝາກເປັນຮູບກົມ, ເສັ້ນຜ່າສູນກາງ 1 ຊມ. ປາຍຮຽວແຫຼມເປັນຈະງອຍ, ເມື່ອແກ່ຈະແຕກເປັນສອງປ່ຽງ.

ເຄືອນ້ຳແນ້ໃຊ້ແກ້ພິດ, ຖອນພິດຈາກແມງໄມ້ກັດຕອດ, ໃຊ້ປິ່ນປົວມະເຮັງຜິວໜັງ ຫຼື ຜິວໜັງອັບເສບ. ໂດຍນຳເອົາໃບດິບ ຫຼື ໃບແຫ້ງມາທັບໂພະໃສ່ບໍລິເວນທີ່ເປັນບາດແຜ, ສຳຫຼັບໃບແຫ້ງແລ້ວປະສົມກັບນ້ຳ. ດອກສາມາດນຳມາປຸງແຕ່ງເປັນອາຫານ ຄ້າຍຄືກັບພວກດອກແຄ, ເຮັດອົ້ວ ຫຼື ລວກກັບແຈ່ວ. ທັ້ງຕົ້ນໃຊ້ເປັນຢາບຳລຸງຮ່າງກາຍ, ໃບໃຊ້ຊົງກັບນ້ຳຮ້ອນດື່ມເປັນຢາແກ້ເຈັບທ້ອງ, ໃບສົດຍັງໃຊ້ເພື່ອຫ້າມເລືອດ, ຮັກສາກະດູກຫຼັກ ແລະ ເຈັບກະດູກ.

N/A

N/A

N/A

,