ເປັນໄມ້ຢືນຕົ້ນຂະໜາດນ້ອຍເຖີງຂະໜາດກາງ ຫຼື ໃຫຍ່, ສູງປະມານ 10 ແມັດ ແລະ ອາດສູງເຖີງ 12 ແມັດ, ລຳຕົ້ນຕັ້ງຊື່, ເປືອກລຳຕົ້ນລຽບໜາເປັນສີນ້ຳຕານ ຫຼື ສີເທົາປົນດຳ, ຕາມລຳຕົ້ນມີຮອຍເປັນຂໍ້ປ້ອງຫ່າງໆຄ້າຍຄືຮອຍຂວັ່ນເປັນຂໍ້ໆ ຕະຫຼອດເຖີງກີ່ງ, ກີ່ງງ່າປ້ອມສັ້ນທຸກສ່ວນມີນ້ຳຢາງສີຂາວຂຸ້ນ. ໃບດ່ຽວຈັບລຽງກົງກັນຂ້າມກັນສະຫຼັບຕັ້ງສາກ, ຮູບຂອບຂະໜານ, ຮູບໄຂ່ແກມຂອບຂະໜານ, ປາຍໃບມົນມີຕີ່ງແຫຼມ, ໂຄນໃບມົນ. ດອກເປັນຊໍ່ແບບຊໍ່ໝາກເດື່ອຊື່ງຈະອອກດອກຕາມລຳຕົ້ນ ແລະ ກີ່ງ ຫຼື ອາດຈະພົບອອກຕາມໂຄນ ຫຼື ຕາມກີ່ງທີ່ຫ້ອຍລົງ, ບໍ່ມີໃບ ຫຼື ພົບເຫັນໄດ້ຕາມຊອກໃບ. ດອກຍ່ອຍມີຂະໜາດນ້ອຍອັດກັນແໜ້ນ ຈະເລີນເຕີບໂຕຢູ່ໃນຖານຮອງດອກທີ່ຫໍ່ຫຸ້ມໄວ້ເພື່ອທີ່ຈະເລີນເຕີບໄປເປັນໝາກ. ຢູ່ປາຍມີຊ່ອງເປີດທີ່ມີໃບປະດັບປິດຢູ່, ມີກ້ານຊໍ່ດອກຍາວ, ດອກອ່ອນເປັນສີຂຽວສ່ວນດອກແກ່ເປັນສີເຫຼືອງຢູ່ໂຄນມີໃບປະດັບ 3 ໃບ ຍາວປະມານ 1–15 ມີນລີແມັດ ລັກສະນະເປັນຮູບສາມຫຼ່ຽມພາຍໃນມີດອກ 3 ປະເພດຄື: ດອກເພດຜູ້, ດອກເພດແມ່ ແລະ ດອກປຸ່ມຫູດ. ດອກເປັນແບບແຍກເພດແຕ່ຢູ່ໃນຊໍ່ດຽວກັນ. ດອກເພດຜູ້ມີປະມານ 1–2 ແຖວ ຢູ່ປາຍມີຂົນເກສອນເພດຜູ້ 1 ອັນ. ສ່ວນດອກເພດແມ່ມີ ຫຼື ບໍ່ມີກ້ານ, ກີບລວມເຊື່ອມຕິດກັນຄ້າຍທໍ່ສັ້ນໆ ແລະ ດອກປຸ່ມຫູດບໍ່ມີກ້ານ, ກີບລວມປົກຄຸມຮັງໄຂ່. ໝາກເດື່ອທົ່ວໄປຮູບຊົງກົມ, ກົ້ນໝາກມີຮອຍບຸ້ມ ມີເສັ້ນສັນ 7–9 ເສັ້ນແຜ່ຮອບໆຈາກຍອດ, ມີຂົນອ່ອນນຸ່ມ ແລະ ມີເກັດປົກຄຸມແບຫ່າງໆ ອອກໝາກຕິດກັນເປັນກຸ່ມແໜ້ນປະມານ 10–15 ໝາກ. ໝາກມີຂະໜາດປະມານ 2.5–4 ຊັງຕີແມັດ. ຜີວໝາກລຽບມີຈຸດສີຂາວໝົ້ດໜ່ວຍ. ໝາກສົດເປັນສີຂຽວພໍສຸກແລ້ວຈະປ່ຽນເປັນສີເຫຼືອງ.

ໝາກເດື່ອປ່ອງມີຣົດຂົມເປັນຢາເຢັນມີສັບພະຄຸນຊ່ວຍຮັກສາໂຣກໂລຫິດຈາງ, ເປັນຢາແກ້ໄຂ້ມາເລເຣຍ, ເປັນຢາແກ້ອາການປວດກະເພາະ. ຮາກ ແລະ ເປືອກລຳຕົ້ນນຳມາຕຳໃຊ້ເປັນຢາທາແກ້ຝີ, ແກ້ຜື່ນຄັນຕາມຜີວໜັງ ຫຼື ໃຊ້ກິນເປັນຢາແກ້ປະດົງ ຫຼື ຈະໃຊ້ແກ່ນນຳມາຝົນກັບນ້ຳປູນໃສທາແກ້ຝີໄດ້ດີ. ນອກນັ້ນໝາກເດື່ອອ່ອນຍັງຮັບປະທານໄດ້ແຕ່ບໍ່ເປັນທີ່ນິຍົມເນື່ອງຈາກມີແມງໄມ້ອາໃສຢູ່ໃນໝາກ, ໃບອ່ອນໃຊ້ຮັບປະທານຮ່ວມກັບແຈ່ວໝາກເຜັດ, ລາບ ສ່ວນຊໍ່ດອກ ແລະ ໝາກອ່ອນເປັນຜັກສົດ ຫຼື ຕົ້ມກິນກັບປົ່ນ ຫຼື ອາດຈະນຳມາປຸງອາຫານຈຳພວກແກງສົ້ມໄດ້.

N/A

N/A

N/A

,