ລຳຕົ້ນເກີດເປັນສຸມ, ເປັນເຄືອ, ເສັ້ນລຳຍາວເຖິງ 30 ມ, ເສັ້ນຜ່າສູນກາງ 3 ຊມ; ກາບໃບສີຂຽວ, ມີຂົນຂາວ ຫຼື ສີນ້ຳຕານປົກຫຸ້ມເປັນຈຸດໆ, ມີໜາມສີນ້ຳຕານແດງ, ຍາວ 5 ຊມ, ປາຍໜາມໂຄ້ງກົງ ແລະ ມີໜາມຂະໜາດນ້ອຍສັບປົນ, ປົກຫຸ້ມກະແຈກກະຈາຍ; ຫູໃບນ້ອຍ, ບໍ່ມີໜາມ; ເຂົ່າໃບພົ້ນເດັ່ນ; ບໍ່ມີມືຈັບເກັບຢູ່ກາບໃບ, ກ້ານໃບສັ້ນ ຫຼື ຍາວເຖິງ 30 ຊມ, ດ້ານເທີງຂອງກ້ານພຽງ ແລະ ມີໜາມ, ກ້ານກາງໃບຍາວ 1.7 ມ, ໃບຍ່ອຍຮູບຫອກ, ແຕ່ລະຂ້າງມີ 16-20 ໃບ, ໃບຍ່ອຍຮຽງບໍ່ສະໝ່ຳສະເໝີ ຫຼື ມີໜ້ອຍທີ່ສຸດຮຽງສະໝ່ຳສະເໝີ; ມືເກາະຢູ່ປາຍໃບເດັ່ນຊັດ, ຍາວ 2 ມ; ຊໍ່ດອກຍາວ 1.3 ມ, ບໍ່ມີມືເກາະ, ຊໍ່ດອກຕັ້ງ; ກາບຊ້ອນຊໍ່ດອກເປັນຫຼອດ; ໝາກບໍ່ໄດ້ເກີດຢູ່ກ້ານສັ້ນ, ຮູບກົມສ້ວຍ ຫຼື ກົມຮູບໄຂ່, ຍາວ 1.2 ຊມ ແລະ ກວ້າງ 1 ຊມ, ສີເຫຼືອງ, ປາຍໝາກຄ້າຍຄືຂວັ້ນນົມ, ເກັດຫຸ້ມໝາກບໍ່ເປັນຮ່ອງ.

ເສັ້ນລຳມີຄຸນນະພາບສູງໃຊ້ເຮັດຫັດຖະກຳເຄື່ອງເຮືອນ. ຍອດອ່ອນສາມາດກີນໄດ້ ແລະ ໝາກສຸກສາມາດເປັນອາຫານສັດປ່າ.