ຈັດເປັນໄມ້ຢືນຕົ້ນຂະໜາດນ້ອຍ ຫຼື ຂະໜາດກາງ. ລຳຕົ້ນສູງ 4-7 ມ ແລະ ສູງໄດ້ຮອດ 8 ມ, ເປືອກລຳຕົ້ນເປັນສີນ້ຳຕານແຕກເປັນຮ່ອງ, ສີນ້ຳຕານ, ຕາມກິ່ງອ່ອນ ແລະ ຍອດອ່ອນມີຂົນສີນ້ຳກະຈາຍຢູ່ທົ່ວ. ໃບປະສົມແບບຂົນນົກປາຍຄູ່, ອອກຮຽງສະຫຼັບ. ໃບຍ່ອຍມີ 5-7 ຄູ່, ອອກເກືອບກົງກັນຂ້າມ, ຮູບຂອບຂະໜານ ຫຼື ຮູບຮີ, ກ້ວາງ 2-3 ຊມ, ຍາວ 7-21 ຊມ, ໂຄນໃບມົນ ຫຼື ແຫຼມ, ຂອບລຽບ, ປາຍແຫຼມ, ແຜ່ນໃບໜາຄ້າຍຄືໜັງ, ຜິວໃບດ້ານເທິງມັນເຫຼື້ອມ, ຜິວລຽບທັງສອງດ້ານ. ກ້ານໃບຍາວ 2-3 ຊມ. ຫູໃບຂະໜາດນ້ອຍ, ຮູບກົມ, ສາມາດເຫັນໄດ້ຊັດເຈນ. ຊໍ່ດອກແບບຮວງເຂົ້າ, ຫ້ອຍລົງ, ອອກບໍລິເວນກິ່ງ ຫຼື ລຳຕົ້ນ, ຍາວປະມານ 75 ຊມ. ດອກຍ່ອຍຈຳນວນຫຼາຍ, ມີທັງດອກສົມບູນເພດ ແລະ ດອກແຍກເພດໃນຊໍ່ດອກດຽວກັນ, ດອກບານເຕັມທີເປັນມີຂະໜາດກ້ວາງ 5-7 ຊມ, ສີຂາວຄີມ. ກາບດອກມີ 5 ກາບ, ຮູບຮີກວ້າງ 3-4 ມມ, ຍາວ 5-6 ມມ, ສີມ່ວງເຂັ້ມ. ກີບດອກມີ 5 ກີບ, ແຍກອອກຈາກກັນອິດສະຫຼະ, ຮູບຮີ. ດອກເພດຜູ້ມີເກສອນເພດຜູ້ 8 ອັນ, ຈັບຢູ່ຖານຮອງດອກທີ່ນູນຂຶ້ນ, ມີຂະໜາດຍາວ 3-4 ມມ, ກ້ານຊູຖົງລະອອງຊັ້ນ ຫຼື ອາດບໍ່ມີເລີຍ. ດອກເພດແມ່ມີເຕົ້າໄຂ່ຈັບເທິງ, ມີເກສອນເພດຜູ້ທີ່ເປັນໝັນ 8 ກ້ານຕິດຢູ່ຮອບໆເຕົ້າໄຂ່, ເຕົ້າໄຂ່ມີ 3 ຫ້ອງ, ແຕ່ລະຫ້ອງມີ 1 ເມັດໄຂ່. ໝາກເກີດເປັນພວງ, 1 ພວງມີ 20-30 ໝາກ, ໝາກຮູບກົມ, ຮູບໄຂ່ ຫຼື ຮູບຮີ, ມີຂະໜາດເສັ້ນຜ່າສູນກາງ 2-3 ຊມ, ຜິວລຽບເປັນມັນ, ໝາກອ່່ອນສີຂຽວປົນສີມ່ວງ, ເມື່ຶອແກ່ເປັນສີມ່ວງດຳ, ເນື້ອອົມນ້ຳ. ແກ່ນມີ 1-2 ແກ່ນ, ຮູບຊົງກົມ, ຮູບໄຂ່ ຫຼື ຮູບຂອບຂະໜານ, ກ້ວາງ 1-1,5 ຊມ, ຍາວ 2-2,5 ຊມ, ຜິວລຽບເປັນສີດຳ.

ອາຫານ:

• ໃບ ແລະ ຍອດອ່ອນ: ນຳມາແກງໃສ່ຜັກ, ແກງໃສ່ປາແຫ້ງ ຫຼື ໃຊ້ເປັນຜັກສົດກິນກັບແຈ່ວ, ນຳມາຕົ້ມ ຫຼື ຫຼວກກັບແຈ່ວໝາກມ່ວງ ຫຼື ແຈ່ວປາແດກ.
• ໝາກ: ໝາກສຸກມີຣົດຊາດຫວານ ແລະ ຟາດນຳມາກິນໄດ້

ສັບພະຄຸນ:

• ຮາກ: ເປັນຢາແກ້ໄຂ້ທຸກຊະນິດ, ແກ້ເລືອດດັງໄຫຼ, ແກ້ອາການຮ້ອນໃນ, ແກ້ອາການກະສັບກະສາຍ, ເຮັດໃຫ້ລະບົບທາງເດີນອາຫານເປັນປົກກະຕິ, ແກ້ອາການທອງຜູກ ແລະ ບໍ່ຖ່າຍ.
• ໝາກ: ໝາກສຸກຊ່ວຍແກ້ອາການຖອກທ້ອງ.

ຄຸນປະໂຫຍດ:

• ໝາກ: ສາມາດນຳມາເຮັດເປັນນ້ຳໝາກໄມ້ໄດ້.
• ສີທີ່ໄດ້ຈາກໝາກສາມາດນຳມາເຮັດເປັນສີປະສົມອາຫານໄດ້.

ໄມ້ປະດັບ: ນິຍົມນຳມາປູກເປັນໄມ້ປະດັບເນື່ອງຈາກໃບມີຄວາມຂຽວເຂັ້ມຕະຫຼອດປີ ແລະ ໝາກມີສີສັນສວຍງາມ.

N/A

N/A

N/A

,