ເຄືອສະມັ່ງຈັດເປັນເຄືອໄມ້ເນື້ອແຂງຂະໜາດກາງ, ເລືອພາດໄປກັບຕົ້ນໄມ້ອື່ນ, ຍາວໄດ້ 5-7 ມ ແລະ ອາດຈະຍາວໄດ້ຮອດ 10 ມ, ແຕກກິ່ງກ້ານສາຂາເປັນຟຸ່ມໜາຕຶບ, ເຄືອອ່ອນເປັນສີຂຽວ, ຕາມລໍາຕົ້ນ ແລະ ເຄືອອ່ອນມີຂົນສີເຫຼືອງ ຫຼື ສີນໍ້າຕານເທົາປົກຄຸມຢູ່, ແຕ່ຕົ້ນແກ່ຜິວມັນກ້ຽງໂດຍເຄືອແກ່ຈະມີເປືອກສີນໍ້າຕານ, ຂະຫຍາຍພັນດ້ວຍແກ່ນ ແລະ ການຕອນກິ່ງ. ໃບເປັນໃບດ່ຽວ, ອອກກົງກັນຂ້າມກັນເປັນຄູ່ໆ, ລັກສະນະໃບເປັນຮູບມົນແກມຂອບຂະໜານ ຫຼື ເປັນຮູບໃບຫອກ, ປາຍໃບແຫຼມ ຫຼື ມົນ ແລະ ມີຕິ່ງແຫຼມ, ກວ້າງ 10-12 ຊມ ແລະ ຍາວ 14-18 ຊມ. ອອກດອກເປັນຊໍ່ຕາມງ່າມໃບ ແລະ ປາຍກິ່ງ ຫຼື ຍອດຂອງລໍາຕົ້ນ, ໃນຊໍ່ໜຶ່ງຈະມີດອກຢູ່ 10-20 ດອກ, ກາບດອກເປັນຫຼອດສີຂຽວ, ໂດຍມີຄວາມຍາວ 3-4 ນິ້ວ ປາຍແຫຼມມີ 5 ກີບ, ກົກກີບດອກເຊື່ອມຕິດກັນເປັນຮູບຫຼອດຮູບຊົງກະບອກຍາວ, ສ່ວນປາຍແຍກເປັນ 5 ກີບ, ດອກເມື່ອເລີ່ມບານຈະເປັນສີຂາວ ຫຼື ສີບົວອ່ອນ, ເມື່ອບານເຕັມທີ່ແລ້ວຈະປ່ຽນເປັນສີບົວເຂັ້ມ ແລະ ເມື່ອໃກ້ຫຼົ່ນຈະເປັນສີແດງ. ໝາກເປັນໝາກແຫ້ງ ແລະ ແຂງ, ລັກສະນະເປັນຮູບກະສວຍ, ມີສັນ 5 ສັນຕາມລວງຍາວ, ໝາກສຸກເປັນສີນໍ້າຕານດໍາ, ພາຍໃນໝາກມີແກ່ນ 1 ແກ່ນ.

ປະໂຫຍດ ແລະ ສັບພະຄຸນ:
- ສາມາດປູກເປັນໄມ້ປະດັບໄດ້.
- ໃບອ່ອນສາມາດນໍາໄປຮັບປະທານໄດ້, ກິນໄດ້ທັງດິບ ແລະ ສຸກ ດ້ວຍການນໍ້າມາຕົ້ມ, ນຶ່ງ, ລວກ ໃຊ້ຮັບປະທານກັບແຈ່ວ.
- ຮາກ ແລະ ໃບ ຊ່ວຍໃຫ້ຈະເລີນອາຫານ.
- ແກ່ນເປັນຢາຮ້ອນມີສັບພະຄຸນເປັນຢາບໍາລຸງທາດ.
- ຮາກ ແລະ ໃບ ຊ່ວຍແກ້ອາການສະເອິກ.
- ແກ່ນ ຊ່ວຍໃນການຍ່ອຍອາຫານ.
- ດອກແຫ້ງໃຊ້ຕົ້ມກັບນໍ້າດື່ມເປັນຢາແກ້ຖອກທ້ອງ.
- ແກ່ນຊ່ວຍແກ້ອາການຕົກຂາວຂອງແມ່ຍິງ.

N/A

N/A

N/A

,