ເປັນໄມ້ຢືນຕົ້ນຂະໜາດນ້ອຍ ຫຼື ໄມ້ຟຸ່ມ ສູງ 3-8 ມ. ແຕກກີ່ງງ່າເປັນຊົງຟຸ່ມ, ກ້ຽງ. ໃບດ່ຽວ, ຈັບກົງກັນຂ້າມ, ແຜ່ນໃບໜາ, ຮູບຮີ ຫຼື ຮູບຂອບຂະໜານ, ຂະໜາດ 5-22 x 4-8 ຊມ, ກ້ຽງທັ້ງສອງດ້ານ, ໂຄນຮູບຫຼີ້ມ, ຂອບເປັນຄື້ນ, ປາຍແຫຼມ ແລະ ມີຕີ່ງຍາວ ເຖີງ 10 ມມ, ເສັ້ນໃບ 6-13 ຄູ່. ກ້ານໃບຍາວ 6-12 ຊມ, ກ້ຽງ. ຫູໃບຮູບສາມຫຼ່ຽມ, ຍາວເຖີງ 12 ມມ, ປາຍມີຕີ່ງຍາວ. ຊໍ່ດອອກອອກຕາມຊອກໃບ, ມີ 2-5 ດອກຕໍ່ຊໍ່, ກ້ານຊໍ່ດອກສັ້ນໆ, ຍາວສຸດ 4 ມມ, ໃບປະດັບຮູບຖ້ວຍ, ຍາວ 1-2 ຊມ, ກ້ານດອກ ຍາວ 2 ມມ. ກາບດອກກ້ຽງ, ຮູບຮີ, ຍາວ 1-3 ມມ, ຂອບເປັນຄື້ນ ຫຼື ມີແຂ້ວ. ກີບດອກເປັນຫຼອດສີຂາວ, ຮູບລຳໂພງ, ກ້ຽງ, ຫຼອດດອກຍາວ 5-15 ມມ, ປາຍແຍກ 5 ແສກ, ຮູບຮີ, ຍາວ 8-20 ມມ, ຮູບຕັດ. ໝາກຮູບໄຂ່, ສີແດງ, ຂະໜາດ 11-17 x 7-14 ມມ, ກ້ຽງ.

ແກ່ນນຳມາຕາກແຫ້ງແລ້ວບົດນຳມາຕົ້ມເປັນກາເຟສົດທີ່ມີຄວາມນິຍົມຫຼາຍ. ນອກນັ້ນຍັງໄດ້ນຳໃຊ້ເປັນສ່ວນປະສົມຂອງເຄື່ອງດື່ມ ແລະ ຂອງຫວານຕ່າງໆ. ໃບສາມາດນຳໃຊ້ກັບລາບ ແລະ ເປັນຜັກໄດ້ດີ. ແກ່ນມີສ່ວນປະສົມຂອງຄາເຟອິນ ເຊິ່ງໃຊ້ປະສົມກັບຢາເພື່ອເປັນຕົວກະຕຸ້ນຂອງຢາແອສໄພຣິນ ແລະ ຢາພາຣາເຊຕາມອລ, ເປັນຢາສະໝູນໄພຊ່ວຍຂັບປັດສະວະ ແລະ ພົກຍ່ຽວອັບເສບ. ຍັງມີການລາຍງານວ່າເປັນຢາຊ່ວຍບຳລຸງກຳລັງ, ແກ້ປວດ, ຮັກສາລະບົບປະສາດສ່ວນກາງ, ກະຕຸ້ນປະສາດ, ຮັກສາພະຍາດຫອບຫືດ, ຮັກສາໄຂ້ຫວັດ, ປວດຫົວ ແລະ ຮັກສາໝາກໄຂ່ຫຼັງອິກດ້ວຍ.